बर्दियाको बाँसगढी नगरपालिकामा बालमैत्री शासन वडा घोषणा अभियान सुरु भएको छ । नगरपालिकाका सम्पूर्ण वडाहरुलाई बालमैत्री स्थानीय शासन वडा घोषणा गर्ने प्रारम्भिक प्रक्रिया सुरु भएको हो । त्यसको तयारी स्वरुप वडा नम्बर ६ मा अनुगमन गरिएको छ । बाँसगढी नगरपालिकाको एउटा प्रतिनिधि टोलीले वडा नम्बर ६ मा स्थलगत अनुगमन गरेको हो ।नगरप्रमुख शालिकराम अधिकारी,उपप्रमुख तथा बालअधिकार समिति संयोजक शुष्मा चौधरी र प्रमुख प्रशासकीय अधिकृत प्रेम बहादुर केसी लगायतको टोली वडा नम्बर ६ मा पुगेको थियो ।
वडा नम्बर ६ लाई फागुन महिनाभित्रै बालमैत्री स्थानीय शासन वडा घोषणा गर्ने अनुगमन टोलीले निष्कर्ष निकालेको हो । महिला बालबालिका तथा जेष्ठ नागरिक शाखा प्रमुख यशोदा थापाले वडाले बालमैत्री घोषणा गर्न आवश्यक सुचक पुरा गरेकोले घोषणाको तयारी भएको जानकारी दिइन् । बालमैत्री स्थानीय शासन सञ्चालन तथा कार्यान्वयन कार्यविधि – २०७७ ले तय गरेको बालमैत्री ५१ ओटा सुचक आवश्यक हुन्छ ।
अनुगमन टोलीले वडा नम्बर ६ भित्र रहेको २ वटा आधारभूत विद्यालय र २ वटा माद्यमिक विद्यालयको भौतिक संरचना,विद्यार्थीहरुको उपस्थिती लगायतका विषयमा छलफल समेत गरेको थियो । अनुगमन टोलीमा सामाजिक विकास समिति संयोजक तुल प्रसाद गौतम, वडा सदस्य शान्ता गुरुङ, स्वास्थ्य शाखा प्रमुख गिता घिमिरे, वडा सचिव, प्रधानाध्यपक, पत्रकार लगायत सहभागीता रहेको थियो।
