विन्दु चौधरी
त्रिभुवन सामुदायिक पुस्तकालय ककौराले नारी दिवसको अवसरमा एक दिने स्त्रीरोग तथा पाठेघरको मुखको क्यान्सर सम्बन्धि परामर्श सेवा दिइएको छ । परामर्श सेवामा भेरी अस्पतालमा कार्यरत प्रसुती तथा स्त्रीरोग विषेशज्ञ तथा महिला क्यान्सर रोग विषेशज्ञ डा. कृतिपाल सुवेदीले पाठेघरको मुखको क्यान्सर सम्बन्धि परामर्श दिनुभएको थियो । डाक्टर सुवेदीले नेपाली महिलाहरुमा सबैभन्दा धेरै हुने क्यान्सरमा पाठेघरको मुखको क्यान्सर एक नम्बरमा रहेको बताउनुभयो । विश्व स्वास्थ्य संगठनका अनुसार नेपालमा प्रत्येक १ लाख महिलामध्ये १६ जना पाठेघरको मुखको क्यान्सरबाट प्रभावित हुनेगरेको डाक्टर सुवेदीले बताउनुभयो । परामर्श कार्यक्रममा उपस्थित महिलाहरुले आफनो समस्या प्रत्यक्ष रुपमा भन्न नसकेर कापिमा लेखेर दिएका थिए । भने डाक्टर सुवेदीले निवारक स्वास्थ्य हेरचाहमा कुनै लक्षण नदेखिए पनि नियमित स्त्रीरोग परीक्षण र पाठेघरको मुखको जाचँ गर्न सुझाव दिनुभएको थियो । पुस्तकालयका अध्यक्ष यज्ञ बहादुर वलीको अध्यक्षमा भएको परामर्श तथा सुचतनामुलक कार्यक्रममा बाँसगढी नगर उपप्रमुख इन्दिरा चौधरी, वाड नं ८ का वडाअध्यक्ष तुलप्रसाद गौतम, वाड नं ९ का वडाअध्यक्ष चन्द बहादुर शाही, शिक्षक, विद्यार्थी, स्थानिय महिलाहरुको उपस्थिती रहेको थियो ।