रावन विश्वकर्मा, बाँसगढी, बर्दिया
बर्दियाको बाँसगढी क्षेत्रमा सडक दुर्घटना न्युनिकरणका लागि चेक जाँच सँगै सचेतना मुलक कार्यक्रमलाई तिव्र पारिएको छ । बढ्दो सवारी दुर्घटना न्युनिकरण गर्ने उदेश्यका साथ बाँसगढी क्षेत्रमा नियमित दैनिक चेक जाँचमा कडाई गर्दै सचेतना मुलक कार्यक्रमलाई समेत तिव्र पारिएको हो । सवारी चालक, सह चालक, सवारी धनी, पैदल यात्री, विद्यार्थी र स्थानिय सँगै सडक प्रयोगकर्तालाई सडक सुरक्षा, ट्राफिक नियम, चिन्ह तथा संकेतहरु, सवारी चलाउदा र यात्रा गर्दा अबलम्बन गर्नु पर्ने सुरक्षा सतर्कता सम्बन्धी विद्यालय, बजार तथा चोकहरुमा सचेतना तथा प्रशिक्षण कार्यक्रमलाई तिव्रता दिएको ईलाका प्रहरी कार्यालय मोतिपुर बाँसगढीले जनाएको छ । 
सोही कार्यक्रम अनुसार शनिबार पुर्वपश्चिम राजमार्ग अन्तर्गत लखना चोकमा दुर्घटना न्युनिकरणका लागि प्रशिक्षण कार्यक्रम सञ्चालन गरिएको छ । सवारी चालक, सहचालक, अटो रिक्सा चालक लगायत स्थानियहरुको सहभागिता रहेको प्रशिक्षण कार्यक्रममा ईलाका प्रहरी कार्यालय मोतिपुर बाँसगढीका प्रमुख प्रहरी निरिक्षक शैलेश्वरी बोहोरा र अस्थाई ट्राफिक प्रहरी पोष्ट बाँसगढीका प्रमुख प्रहरी सहायक निरिक्षक दिपक थापाले सडक सुरक्षा र ट्राफिक नियमका बारेमा जानकारी दिनुभएको थियो ।
सवारी चालक तथा सडक प्रयोगकर्ताले पालना गर्नु पर्ने नियम, अपनाउनु पर्ने सावधानी र ध्यान दिनु पर्ने कुराका बारेमा सवारी चालक तथा सडक प्रयोगकर्तालाई कार्यक्रम मार्फत सचेत पारिएको प्रहरी साहयक निरिक्षक दिपक थापाले बताउनु भयो । बाँसगढी क्षेत्रमा बिहान ७ बजे देखी १० बजे सम्म, दिउसो २ बजे देखी ५ बजे सम्म नियमित सवारी चेक जाँचमा कडाई सँगै बेलुका ६ बजे देखी ९ बजे सम्म नियमित मापसे चेक जाँच गरिदै आएको अस्थाई ट्राफिक प्रहरी पोष्ट बाँसगढीका प्रहरी हवल्दार शान्त बहादुर वलीले जानकारी दिनुभयो ।
