बबई नदीमा दाउरा समात्न गएका तीन जना बेपत्ता भएका छन् । लगातारको बर्षा सँगै आईतबार बबई नदीमा आएका दाउरा समात्न गएका तीन जना बेपत्ता भएका हुन् । गुलरिया नगरपालिका–१२ भैसाहीका ३० वर्षिय बालकृष्ण थारु, गुलरिया नगरपालिका–८ थपुवाका २२ वर्षिय अक्षय चौधरी र गुलरिया नगरपालिका २ पण्डितपुरका २७ बर्षिय महेश चौधरी बेपत्ता भएको जिल्ला प्रहरी कार्यालय बर्दियाका डिएसपी हिक्मत बहादुर बोहराले बताउनु भयो । नदीमा दाउरा लिन गएका बेला तिनै जना बेपत्ता भएको डिएसपी बोहराले बताउनु भयो । नेपाल प्रहरी,सशस्त्र प्रहरी र नेपाली सेनाको टोली खोजतलासको लागि परिचालन भएको छ । प्रहरीको संयुक्त टोली बोर्ड लिएर खोजतलासमा जुटेको डिएसपी बोहराले जानकारी दिनुभयो । बबई नदी चेपाङ र भादा केन्द्रमा जलसतह सतर्कता तह नजिक रहेको र बढ्दो क्रममा रहेको छ । नदी तटीय क्षेत्रमा बसोबास गर्ने सर्वसाधारणलाई प्रशासनले सतर्कत रहन अनुरोध गरिरहेको छ ।
